Нешто повеќе од една недела по забраната на неонацистичкото здружение „Hammerskins“, германското Министерство за внатрешни работи на министерката Ненси Фрејзер, која доаѓа од редовите на СПД, ги забрани активностите на друга екстремно десничарска група.
Полицијата од утрово претресува 39 припадници на расистичката верска заедница „Artgemeinschaft“. Според првиот човек на МВР, забранета е работа на помали групи со неонацистички карактер кои работеле заедно со оваа секта.
Од утрово во 12 сојузни провинции трае полициска рација во која се запленува имотот на членовите на сектата, а во меѓувреме е блокирана и нивната веб-страница.
Според „Шпигел“, оваа германска верска заедница е една од најстарите екстремно десничарски групи во Германија. На нивната веб-страница, тие отворено ја пропагираа својата етничко-расистичка идеологија со милитантен карактер, повикувајќи на борба и смртоносен презир кон се што не е германско. Расистичката секта е основана во 1950-тите, а од 1957 година работи како регистрирано здружение со седиште во Берлин.
Според последниот извештај на Баварската канцеларија за заштита на уставот, ова е многу важна алка на неонацистичката карта на Германија. За да ги заштитат Германците од мешање со други „видови“, водачите на сектата им наметнаа правила на нивните следбеници кои потсетуваат на нацистичката ариевска манија на Третиот Рајх. Едно од барањата е дека нивните следбеници „не смеат да се мешаат со други видови“. Се проценува дека здружението има околу 90 членови, но може да се видат повеќе од 300 луѓе на нивните собири, вклучувајќи деца и млади.