Во населбата Нов Белград вчера, повозрасна жена беше застрелана со воздушна пушка среде бел ден, известуваат српските медиуми. Овој напад не е изолиран инцидент, туку дел од серија слични случаи каде непознат сторител пука кон граѓаните.
Жителите на улицата „Отон Жупанчиќ“ подолго време пријавуваат дека еден сосед редовно пука со воздушна пушка во населените делови, каде се наоѓаат пазар и детски игралишта. „Беше само прашање на време кога ќе се случи нешто вакво. Често пука, а сега е погодена постара жена. За среќа, не е сериозно повредена, но сите сме во страв,“ изјави една од жителките на улицата.
Жената е погодена во раката и веднаш повикала полиција и брза помош. Лекарите ѝ објасниле дека раната не е сериозна, и дека фрагментот од дијаболата што сè уште се наоѓа во нејзината рака, ќе падне при зараснувањето.
Соседите се вознемирени и во страв дека следниот напад може да биде насочен кон кој било, вклучувајќи ги и децата што играат во близина. „Чувствуваме како да сме мете, само чекаме кој ќе биде следниот. Најмногу се плашиме за децата,“ рече жената погодена од мистериозниот напаѓач.
Ова не е прв ваков случај во Белград. Пред една година, 71-годишна жена, болна од рак, беше застрелана двапати од тераса во населбата Бежанијска Коса. Тогаш пукачот, Срѓан Т., беше откриен и приведен, а локалните жители сведочеа за долгогодишна агонија со истиот напаѓач.