Не престануваат реакциите во јавноста после контроверзното велигденско послание на владиката Петар. Тој во годинешно обраќање објавено на социјалните мрежи, жестоко го нападна феминизмот и кажа дека родовата еднаквост е изопачена. Порача дека сѐ почесто се случувало феминистички здруженија, барајќи права, да го вперат прстот во Црквата и како одговор на 8 мартовски транспарент, за кој како што тврди бил со вулгарна порака, вели дека пред појавата на феминизмот жените биле домаќинки, додека сега се еманципирани, но и се почесто разведени.
Здружение за поддршка на маргинализирани работници СТАР-СТАР Скопје
Дел од невладините организации јавно го осудуваат ваквиот говор кој ги стигматизира и деградира жените. Од Здружението за поддршка на маргинализирани работници СТАР-СТАР Скопје во разговор за „Локално“ велат во изминатиов период, сведоци сме на многубројни јавни излагања на претставници на Црквата, во кои се стигматизираат одредени ранливи категории на граѓани, што е навистина загрижувачки и опасно за целото општествто.
-Поразително е тоа што медиумите ги пренесуваат ваквите дискриминирачи изјави на сензационалистички начин и без никава осуда, што пак дополнително придонесува за ширење на омраза и насилство помеѓу народот. Во Република Северна Македонија, како секуларна држава, црквата нема право да се меша во обликувањето и донесувањето на законите кои се однесуваат на родовата еднаквост, потенцираат од СТАР-СТАР.
Сметаат дека за таквото однесување треба да се позанимаваат стручните институции.
-Предрасудите, стигмата и говорот на омраза, кон ранливите категории на граѓани, меѓу кои и жените, се постојано присутни во нашето општество. Како што напоменавме и претходно ова се должи на конзервативната традиција и култура во која живееме и невидливоста на маргинализираните луѓе во јавната сфера. Односот кон овие маргинализирани лица е загрижувачки, и потребно е воведување на промени особено во делот на пристап до правда, здравство, социјална заштита, како и спроведување на соодветни санкции согласно законските прописи против ширењето на говор на омраза, повикување на насилство и јавно стигматизирње без разлика од каде доаѓа, институциите, медиумите, МПЦ и/или ИВЗ, ни рекоа од здружението.
Упатуваат пораки од МПЦ дека треба да се престане со ваквиот навредлив настап на црковните лица.
-Овој нов тренд на јавно ширење мизогинија, говор на омраза и повици за насилство, предводен од верските лица, треба што е можно побрзо да запре и Црквата да почне да се занимава со практикување на религиските учења согласно законските можности во нашата земја, а не со ширење на демагогии за феминистичките движења и жената во општеството, истакнуваат од СТАР-СТАР.
Јованка Тренчевска
Со остра реакција денеска се огласи и министерката за труд и социјала, Јованка Тренчевска. Му порача на владиката Петар дека „не е време за инквизиција“.
-Владико тоа ти со твоите ретроградни ставови, со понижувањата и омаловажувањата кон жената не можеш да го разбереш. Богохулие е отровот што го пушташ и со кој навредуваш и понижуваш 51% од популацијата. Не си ги разбрал поимите, но и времето во кое живееме. Не е време на инквизиција, Владико. Живееме во демократија. Во време кога можеби не секоја жена е гласна, храбра, но оние гласните и храбри се борат за родова еднаквост. За своите права и правата на секоја друга жена. За правата на секој поединец во општеството, објави Тренчевска на социјалните мрежи.
Н.П.