Nissan Silvia, познат и како моделите 200SX и 240SX на некои пазари, исчезна од гамата на јапонската компанија во 2002 година, но сега постои шанса да се врати ова познато име.
Иван Еспиноза, потпретседателот на Nissan за глобална стратегија и планирање производи, зборуваше за идејата за нова Silvia позиционирана под GT-R. Тој замислува модел кој ќе нуди „доволно моќ по вистинска цена за да биде привлечен за клиентите“.
Еспиноза тврди дека навистина сака да ја „оживее“ Silvia и истакнува дека ова име има многу фанови, пренесува Klix.
Овие детали ги сподели во интервју за „Top Gear“:
„Има шанси, но ова е бизнис, па морам да најдам начин да го направам овој предлог интересен за компанијата. Понекогаш ваквите автомобили се „борат“ бидејќи нема многу купувачи, но дефинитивно можеме да успееме ако најдеме вистинската идеја што може да функционира насекаде во светот. Не можеме да ги продаваме овие производи регионално или како уникатни, бидејќи има шанса, тоа ќе биде предизвик, а мојата работа е да најдам начин да ги направам овие работи. Автомобилот би бил одличен за клиентите и за марката“, рече Еспиноза.
Читајќи меѓу редови, новата Silvia би можела да му се придружи на Nissan Z како попристапен и веројатно електрифициран спортски автомобил. Моделот би станал ривал на Toyota GR86, Subaru BRZ, Mazda MX-5 и најавениот хибриден Honda Prelude.
Nissan вети дека ќе претстави 30 нови модели до 2026 година, вклучувајќи 16 електрични возила и хибриди, сите како дел од бизнис планот The Arc. Точното време на пристигнување на новата Silvia не е познато, но веројатно е дека моделот ќе пристигне малку подоцна, за да се најде време за развој и подготовка за пазарот.