Британскиот принц Хари и неговата сопруга Меган Маркл нема да присуствуваат на крунисувањето на Чарлс Трети следниот месец, откако нивните деца не беа поканети, а барањето на парот тој ден да му се пее роденденска песна на нивниот син Арчи на балконот на палатата беше одбиено, пишува Sky News.
Церемонијата на крунисување на Чарлс Трети и неговата сопруга Камила ќе се одржи на 6 мај во Вестминстерската опатија. Медиумите минатиот месец објавија дека Арчи и неговата сестра Лилибет не биле поканети.
Биографот за кралското семејство Анџела Левин изјави за Sky News дека Хари и Меган побарале да застанат на балконот со кралското семејство за време на крунисувањето и сите присутни да му испеат на Арчи роденденска песна, чиј роденден се совпаѓа со датумот на крунисувањето, но дека ниту едно од тие барања не било одобрено па парот нема да присуствува на настанот.
Принцот Хари и американската актерка Меган Маркл се венчаа во 2018 година. Тие ја напуштија Велика Британија две години подоцна, поради контроверзии во кои беа вклучени британските медиуми и наводен конфликт во кралското семејство, пишува РИА.
Во март 2021 година, парот даде сензационално интервју со американската водителка Опра Винфри во кое ги обвинија своите кралски роднини за рамнодушност, недостаток на поддршка и расизам.
Во јануари, Хари ги објави своите мемоари во кои открива многу приватни информации за неговиот живот и за односот со неговото семејство.