Земјите-членки на ЕУ денеска ја обвинија Белорусија дека директно ја загрозува ЕУ со тоа што бегалците кои бараат азил од нивната територија ги брка во соседните земји.
Европската унија го обвинува белорускиот претседател Александар Лукашенко дека организирал пристигнување на илјадници луѓе на границите на Литванија, Летонија и Полска со цел да се одмазди за санкциите воведени против Белорусија.
Министрите за внатрешни работи на ЕУ ја обвинуваат Белорусија дека се обидува да ги „инструментализира човечките суштества за политички цели“.
ЕУ се плаши од повторување на мигрантската криза во 2015/16 година кога хаотичното доаѓање на повеќе од милион луѓе од Блискиот Исток ги загрози и преоптовари безбедносните и социјалните системи и охрабри поддршка за екстремно десничарските организации во рамките на Унијата.
Во исто време, припадниците на латвиската гранична служба денеска спречија илегален влез на 46 мигранти, а уште шест лица кои дојдоа од Белорусија во последните 24 часа беа приведени.
Според информациите на граничната полициска служба, шест мигранти се пуштени да влезат во земјата од хуманитарни причини.
Напнато беше и на границата меѓу Белорусија и Литванија, која испрати протестна нота до Минск, бидејќи група белоруски граничари ја наруши литванската граница, изјави денеска литванскиот министер за надворешни работи, Габриелиус Ландсберг.
Во меѓувреме, Полска распореди стотици војници на границата со Белорусија со цел да им обезбеди поддршка на граничарите во време кога голем број бегалци сакаат да влезат во земјата, потврди денеска полскиот министер за одбрана Мариуш Блашчак.
Министерот рече дека во операцијата биле вклучени повеќе од 900 полски војници, објави претходно агенцијата АП, наведувајќи дека се верува дека повеќето бегалци потекнуваат од Ирак.