Руските власти соопштија дека Пригожин бил наведен како патник во авионот што се урна северозападно од Москва во средата вечерта, два месеца откако тој го предводеше неуспешниот бунт против военото раководство.
Руските истражители започнаа истрага за тоа што се случило, но официјално не го потврдија идентитетот на десетте тела извлечени од урнатините.
„Се уште нема дефинитивен доказ дека Пригожин бил во авионот, а тој е познат по спроведувањето исклучителни безбедносни мерки. Сепак, голема е веројатноста дека тој навистина е мртов“, соопшти британското министерство во ажурирањето на одбранбеното разузнавање објавено на платформата Х, порано позната како Твитер.
„Смртта на Пригожин речиси сигурно ќе има длабоко дестабилизирачки ефект врз групата Вагнер. Неговата хиперактивност, исклучителна смелост, желба за резултати и екстремна бруталност ја туркаа паравојската и малку е веројатно дека тој ќе добие сличен наследник“, истакнуваат тие.
„Групата е дополнително обесхрабрена од извештајот дека починале и основачот и теренски командант Дмитриј Уткин и шефот на логистиката Валериј Чекалов“, заклучуваат оттаму.