Германскиот производител на луксузни автомобили Audi се откажа од потрагата по инвеститор во фабрика во Брисел и планира да ја затвори на почетокот на следната година како дел од напорите за намалување на трошоците во матичната групација Volkswagen.
На почетокот на јули, Volkswagen Group, чадор-компанија на Audi, навести дека може да ја затвори фабриката на Audi во Брисел поради остриот пад на побарувачката за луксузни електрични автомобили.
Околу два и пол месеци подоцна, тие објавија дека ќе ја продадат фабриката, а шефот на производството, Герд Вокер рече дека бараат потенцијални инвеститори.
Фабриката во Брисел го произведува само електричниот теренец Q8 e-tron на Audi, а матичната група VW нема планови да произведува други модели на локацијата, рекоа тие во септември, истакнувајќи дека „во моментов не постои економски исплатлива алтернатива“ за негова употреба во групата.
Фабриката се наоѓа помеѓу станбена зона, железничка пруга и автопат, што го спречува нејзиното проширување. Трошоците за логистика се значително повисоки отколку на други локации поради малиот број локални добавувачи, нагласуваат од Audi.
Во вторникот менаџментот објави дека се откажува од потрагата по инвеститор, пренесе „Index“.
„Потенцијален инвеститор од секторот за комунални возила го повлече своето писмо за интерес. Ниту еден потенцијален инвеститор не покажал интерес за објектот, па затоа активната потрага (…) е завршена“, се вели во соопштението.
Audi не утврди ниту можна алтернативна намена, па фабриката – пропаѓа.
Audi вработува околу 54.000 работници во Германија, од кои некои се соочуваат со отпуштања
Раководството на Audi во изминатите четири месеци преговараше со работничкиот совет и синдикатите за планот за згрижување на 3.000 работници и беше договорено никој да не биде отпуштен до крајот на годината.
Паралелно, раководството разговара со работничкиот совет во Инголштад, Германија, за опции кои би ги елиминирале отпуштањата во германските фабрики.
Audi вработува околу 54.000 работници во Германија.
На почетокот на месецот објавија дека речиси се „стопила“ оперативната добивка во третиот квартал, која се лизнала на само 106 милиони евра, поради трошоците за затворање на фабриката во Брисел и остриот пад на продажбата.
Затворањето на фабриката во Брисел резултираше со трошоци од 1,2 милијарди евра, изјави финансискиот директор Јурген Ритербергер.
Главната задача на менаџментот во моментов е да ја подобри ефикасноста и конкурентноста, рече Ритербергер, нагласувајќи дека нема да отпуштаат работници до 2029 година, како што се обврзале и дека ќе ги задржат специјализантите.