Повеќе од 1.000 новинари и други вработени во „Њујорк Тајмс“ ја напуштија работата на 24 часа во четвртокот, незадоволни поради повеќемесечните преговори за договор во најголемиот работен спор на весникот во повеќе од 40 години.
Стотици новинари, уредници, фотографи и други вработени протестираа пред канцелариите на весникот во близина на Тајмс Сквер во Менхетен, Њујорк.
Новинарскиот синдикат на NewsGuild го исполни своето ветување дека ќе штрајкува откако двете страни не постигнаа договор во маратонските разговори кои пропаднаа во средата навечер.
Страните остануваат далеку една од друга по прашањата, вклучително и платите, политиките за работата од далечина и системот за проверка на перформансите, за кој синдикатот вели дека е расно пристрасен. Сегашниот договор истече во март 2021 година, а синдикатот ја обвини компанијата за одложување на преговорите.
– Не сум лут. Јас сум само длабоко разочаран од нашата компанија. Не треба да се мачите финансиски ако работите на место како „Њујорк тајмс“, без разлика каква е вашата позиција – изјавила Никол Хана Џонс, добитничка на Пулицерова награда и истражувачка новинарка која зборувала на собирот, пренесува „Франс прес“.
NewsGuild тврди дека вработените заслужуваат подобра компензација за нивната улога во помагањето на „Њујорк тајмс“ да стане успешна приказна во индустријата за весници.
„Њујорк Тајмс“, кој ја зголеми својата база на претплатници во последниве години, предвидува прилагоден оперативен профит од 320 до 330 милиони долари за 2022 година во својот најнов извештај за заработка.