Пријателите и приврзаниците на затворениот руски опозиционер и критичар на Кремљ Алексеј Навални денеска понудија парична награда за информации за неговата моментална локација откако „исчезна“ од рускиот затворски систем пред речиси три недели.
Локацијата и здравствената состојба на Навални се непознати откако неговите адвокати последен пат се сретнаа со него на 5 декември.
Соработниците на 47-годишниот активист предупредија дека неговиот живот може да биде во опасност, велејќи дека Навални имал „сериозни здравствени проблеми“ непосредно пред да исчезне, пишува „Moscow Times“.
„Нудиме награда (во криптовалути) за секоја целосна и точна информација за Алексеј“, објавил тимот на Навални на платформата Х.
Соработниците на Навални го поврзаа времето на неговото исчезнување со најавата на претседателот Владимир Путин на 8 декември дека ќе бара реизбор во претседателската трка во 2024 година.
Навални потоа ги повика Русите да „гласаат за кој било друг кандидат“ покрај Путин на претстојните избори. Тој издржува нова затворска казна од 19 години за „екстремизам“.
Неговите адвокати неодамна соопштија дека тој бил преместен на непозната локација од затворот во Владимирската област во централна Русија, каде што веќе одлежувал казна поради обвинение за измама.
Навални беше затворен во 2021 година, откако се врати во Москва од Германија, каде што се опоравуваше од нападот на труење со Новичок, нервен агенс од советско потекло.