Според најновиот извештај на Wine-Searcher, најголемиот интернет пребарувач за вина и алкохолни пијалоци со база на податоци со цени на околу 20 милиони производи, со 36.000 продажни места во 126 земји, објавена е листа на 50 најскапи вина во 2024 година.
Веднаш паѓа во очи дека дури 44 места имаат вина од Франција, дека доминираат две винарии – Leroy Domaine D’Auvenay и Domaine de la Romanée-Conti – и дека сите се од Бургундија, со исклучок на Jean-Louis Chave, кој се наоѓа во Северна Рона.
Списокот за 2024 година е сличен на оној од претходната година, но со пониски цени за најскапите вина, во просек намалени за 12-15%. Сè уште на тронот, како и претходните години, е Leroy Musigny Grand Cru, чија цена во однос на 2023 година паднала за цели 24% и сега изнесува повеќе од 37.000 американски долари по шише.
За споредба, ова вино чинело во просек 15.894 долари пред четири години, што јасно покажува колку цените на виното се зголемиле на глобално ниво во последно време. Овој тренд најдобро говори податокот дека просечната цена на 10-те најскапи вина од листата Wine-Searcher пред четири години изнесувала околу 7.800 американски долари, додека оваа година достигнала повеќе од 19.500 американски долари! Инфлацијата, сепак, тешко може да го објасни поскапувањето од дури 150%.
Но, да се вратиме на овогодинешната листа на најскапи вина. На второ и трето место се најдоа вината на Domaine de la Romanée-Conti, Romanée-Conti Grand Cru (24.235 долари) и Leroy Domaine d’Auvenay Chevalier-Montrachet Grand Cru (23.331 долари), кои го потврдуваат престижот на Бургундија во светот на виното. .
Како што споменавме, само шест вина на листата не се од Франција. „Натрапниците“ се три вина од Португалија, две од Германија и едно од САД, поточно од долината Напа во Калифорнија. Исто така, треба да се напомене дека и португалските и германските вина на списокот се слатки или збогатени, што укажува дека десертните вина сè уште имаат значајно место меѓу колекционерите.
Комплетната листа на 50 најскапи вина можете да ја погледнете на веб-страницата Wine-Searcher.