Погребот на последниот лидер на Советскиот Сојуз, Михаил Горбачов, кој почина во вторникот во Москва на 91-годишна возраст, ќе биде извршен во сабота, објави новинската агенција Интерфакс, повикувајќи се на ќерката на Горбачов.
Погребната церемонија ќе се одржи во познатата сала на колумните во Домот на синдикатите во Москва, јави Интерфакс, истото место каде што телото на Јосиф Сталин беше изложено по неговата смрт во 1953 година.
Алексеј Венедиктов, поранешен уредник на радио станицата „Ехо Москва“ и пријател на Горбачов, исто така во објавите на социјалните мрежи извести дека погребот ќе се одржи во сабота, на 3 септември.
Обредот ќе биде отворен за јавноста, а Горбачов потоа ќе биде погребан на централните гробишта Новодевичи во Москва, објави новинската агенција ТАСС, повикувајќи се на Владимир Полјаков, портпарол на Фондацијата Горбачов.
Десетици високи политичари, поети, членови на кралското семејство и интелектуалци се погребани на тие гробишта од нивното формирање во 16 век – меѓу нив и Борис Елцин, првиот претседател на Русија и политичкиот ривал на Горбачов. Таму почива и сопругата на Горбачов Раиса, која почина во 1999 година.
Никита Хрушчов е единствениот советски лидер погребан таму, а повеќето од другите се закопани покрај ѕидовите на Кремљ на Црвениот плоштад.
Портпаролот на Кремљ, Дмитриј Песков, претходно изјави дека Кремљ во среда ќе одлучи дали на Горбачов ќе му биде извршен државен погреб.
Новинската агенција ТАСС објави дека Песков рекол дека Кремљ подоцна ќе објави дали претседателот Владимир Путин ќе присуствува на погребот на Горбачов.
Претходно во средата, Путин преку телеграма им изрази сочувство на роднините на Горбачов. Кремљ за покојниот политичар рече дека тој е извонреден светски државник кој помогнал да се стави крај на Студената војна, но дека направил голема грешка во однос на можноста за зближување со „крвожедниот“ Запад.