Првиот човек на Volkswagen, Томас Шефер, во изјава за медиумите откри дека во Волфсбург подготвуваат редизајнирано издание на осмата генерација на Golf, кое ќе се појави пред јавноста следната година.
Шефер, исто така, потврди дека освежениот Golf (8.5) ќе биде последниот Golf придвижуван од мотори со внатрешно согорување, бидејќи следната генерација на еден од најпродаваните автомобили на сите времиња ќе биде придвижуван од електромотор(и).
Со освеженото издание на бестселерот на VW, не се очекуваат големи промени под предната корица, но се очекува враќање на поергономски физички копчиња за контрола на одредени функции и уште подобри материјали во патничкиот простор.
На врвот на понудата се спортските верзии GTI и R, чии дволитарски четирицилиндрични турбо бензински мотори треба да бидат уште помоќни и поекономични, а со целосна електрификација планирана за деветтата генерација, сите верзии на Golf ќе бидат значително помоќни од постоечките.