По прекинот што настана поради третманот на пациентите од пожарот во Кочани, хируршките клиники во Скопје од денеска повторно ќе започнат со оперативни зафати за онколошки пациенти, додека од утре се очекува сите клиники да работат со полн капацитет, најави министерот за здравство Арбен Таравари.
„Од денеска хируршките клиники ќе почнат да функционираат, но не со полн капацитет – само за онколошки пациенти. Се надевам дека од утре, по состанокот на кризниот штаб, сите клиники ќе работат според планираните програми,“ изјави Таравари.
Министерот ја соопшти и најновата состојба на пациентите повредени во пожарот, кои се на лекување во државните и странските болници. Според него, најважната вест е дека по изминати 72 часа нема починати.
Во државните здравствени установи моментално се третираат 178 пациенти, од кои 64 се во државните болници, а 13 во приватни здравствени центри, сите во релативно стабилна состојба. Дополнително, во странство на лекување се испратени 101 пациент, кои, според Таравари, исто така се во стабилна состојба.