„Мораме барем да имаме добри односи со ЕУ и не можеме да си дозволиме да ги влошиме односите со Кина“, рече заменик-директорот на здружението за индустрија „Swissmem“ Жан-Филип Кол.
Одлуката на американскиот претседател Доналд Трамп да воведе повисоки царини за Швајцарија од повеќето европски земји предизвика голем шок во таа извозно ориентирана земја, приближувајќи ја до Европската унија додека се обидува да ги ублажи последиците од таа одлука.
Иако привремено ги намали царините во средата, што донесе одредено олеснување за поборниците за поцврсти врски со ЕУ, оваа ситуација дополнително ја потврди нивната позиција, дека во се понепредвидлив свет, Швајцарија мора да ја зајакне соработката со европските соседи.
По воведувањето на тарифите, швајцарската министерка за финансии Карин Келер-Сатер разговараше со претседателката на Европската комисија, Урсула фон дер Лајен и тие се согласија да останат во близок контакт во врска со понатамошните чекори.
Во петок, Келер-Сатер ќе стане првиот швајцарски министер за финансии кој ќе учествува на редовниот состанок на министрите за финансии на ЕУ (ECOFIN). Минатата недела Трамп воведе царини од 20 отсто за ЕУ, додека Швајцарија ја „удри“ со стапка од 31 отсто, а двете области сега се соочуваат со царини од 10 отсто.
Иако поканата на Келер-Сатер за состанокот во Варшава дојде пред реизборот на Трамп, нејзиното учество доаѓа во време кога Швајцарија ја интензивира соработката со ЕУ во клучните стратешки области, како одговор на глобалните нестабилности како што е руската војна во Украина и растечкиот протекционизам на САД.
Итно бараат нов договор со Брисел
Заменик-директорот на индустриското здружение „Swissmem“ Жан-Филип Кол рече дека шокантните пресвртувања во американската политика дополнително ја нагласија итноста за склучување нов договор со Брисел кој ќе ги зајакне идните односи со ЕУ, најголемиот пазар во Швајцарија.
„Можеби сега некои граѓани ќе разберат дека мораме барем да имаме добри односи со ЕУ и дека не можеме да си дозволиме да ги влошиме односите со Кина, особено ако САД се повлечат“, рече тој.
Сепак, имајќи ги предвид предизвиците со кои се соочуваат големите економии како Германија, Швајцарија ќе мора да го прошири својот бизнис опсег и надвор од Европа, додаде Кол, истакнувајќи го потенцијалот на Индија и Југоисточна Азија.