Големото финале на следното издание на Евровизија ќе се одржи во салата St. Jakobshalle во Базел на 17 мај, одлучија локалниот јавен сервис SRG SSR и Европската радиодифузна унија. Полуфиналните вечери на 69. натпреварување ќе се одржат на 13 и 15 мај.
Базел на тој начин ја надмина Женева благодарение на подобрата локална инфраструктура, можноста да биде домаќин на илјадници делегации и посетители од целиот свет, како и соодветната сала.
Мартин Остендал, извршен супервизор на Евровизија, вели дека ЕБУ е „воодушевена“ што Базел е избран за домаќин на следниот настан.
„Натпреварот е роден во Лугано во 1956 година и прекрасно е да се врати во својата земја речиси 70 години подоцна“, рече Остендал, додавајќи дека стратешката позиција на Базел го прави идеален домаќин на Евровизија.
„По натпреварите што се одржаа во италијанското и француското говорно подрачје во земјата – во 1956 и 1989 година – возбудени сме што за прв пат ќе ја донесеме Евровизија во германскиот дел на Швајцарија“, додаде тој.
Швајцарија ја освои третата победа на овогодинешниот натпревар во Малме благодарение на Немо и песната „The Code“.
Првата Евровизија во историјата, одржана во таа земја, беше и единствената каде што од изведувачите се бараше да изведат две песни наместо една.
Тогаш победи Лис Азија со песната „Refrain“ на француски, но не е познато како била котирана нејзината втора песна на германски „Das alte Karussell“, бидејќи поените на жирито никогаш не биле претставени.
Втората победа на Швајцарија беше забележана во Даблин во 1988 година, кога релативно непозната Канаѓанка ја зеде круната во „фото-финиш“. Станува збор за подоцна познатата Селин Дион, која за Швајцарија ја изведе баладата „Ne Partez Pas Sans Moi“.
На швајцарската радиодифузна корпорација и требаа уште 36 години да најде трет шампион во Немо и неговата песна „The Code“, која победи минатата година во Малме.