Стапката на вработеност меѓу украинските бегалци кои дојдоа во Германија до јуни 2022 година е речиси двојно зголемена за нешто помалку од две години, според студијата на Федералниот институт за истражување на населението (BiB), пренесува германската новинска агенција (dpa).
Додека стапката на вработеност на украинските бегалци беше 16 отсто во летото 2022 година, таа се искачи на 30 отсто во пролетта оваа година. Податоците се засноваат на студијата na BiB и семејната демографска табла.
Според BiB, моментално има околу 1,1 милион Украинци кои избегале од руската агресија и живеат во Германија. И покрај растечката стапка, експертите продолжуваат да ги критикуваат многуте пречки што стојат на патот на Украинците кои бараат работа.
Лошата економска состојба, долгите процедури за признавање на странски професионални квалификации и (понекогаш) постоечките услови за престој имаат негативно влијание врз успешното барање работа.
Според податоците на BiB, 30 отсто од анкетираните изјавиле дека активно бараат работа, пренесува dpa.
Но, тоа е особено тешко за жените со деца: стапката на вработеност на мајките со мали деца е околу 22 отсто, а 32 отсто за мајките со деца кои тргнале на училиште.
Стапката на вработеност кај украинските мажи со малолетни деца е 41 отсто, изјави директорката на BiB, Катарина Спиес.
Повеќето од оние кои не бараат работа го прават тоа поради јазичните бариери: 92 отсто од нив сè уште посетуваат јазичен курс или немаат доволно познавање на германскиот јазик.