Околу 85 отсто од луѓето во Србија мислат дека насилството врз жените е приватен проблем, изјави во четвртокот Гордана Предиќ, советник во српското министерство за култура.
На конференцијата за борба против родовото насилство врз жените, таа рече дека мнозинството српски граѓани веруваат дека семејното насилство е приватна работа и дека не треба да се мешаат.
„Пред да се случи фемицид, мора да пријавиме насилство, а не да го игнорираме“, рече Предиќ, пренесува агенцијата „Бета“.
Таа, исто така, рече дека „голем товар“ за жените е неплатената работа и дека тие поминуваат двојно повеќе време од мажите во домашните работи.
„Проблем е економската зависност на жените. Покрај работата, тие секојдневно поминуваат по два до четири часа во домашни работи. Оваа работа според некои пресметки чини околу 546 евра месечно. Поради домашните обврски, жените немате време да се дообразуваат и да се посветите на себе“, тврди Предиќ.
Таа оцени дека проблемот е уште поизразен во селата.
„На село, три од четири жени работат без плата“, додаде таа.
Конференцијата „Клучни предизвици во обезбедувањето родова еднаквост во Србија: борба против родовото насилство врз жените и признавање на неплатената работа“ е дел од кампањата „16 дена активизам против насилството врз жените“.