Амбасадорот на Украина во Обединетото Кралство, Валери Залужни, во четвртокот изјави дека Соединетите држави го доведоа во прашање „единството на Западот“, пренесува Би-Би-Си.
– Не се обидуваат само оската на злото и Русија да го променат светскиот поредок. САД се обидуваат да го уништат, рече Залужни за време на конференцијата во Кралскиот институт за меѓународни односи (Chatham House), тинк-тенк со седиште во Лондон.
Залужни изјави дека преговорите меѓу Америка и Русија покажуваат дека Белата куќа се приближува до Кремљ и дека се обидуваат да се сретнат на половина пат.
Покрај тоа, Залужни смета дека рускиот претседател Владимир Путин е воен злосторник.
Амбасадорот на Украина во Велика Британија сугерираше дека промената во однесувањето на Вашингтон може да доведе до колапс на Организацијата на Северноатлантскиот договор и дека Русија може да ја нападне Европа.
Залужни смета дека двете неодамнешни одлуки на САД, суспензијата на испраќањето разузнавачки информации во Украина и гласањето против резолуцијата на Обединетите нации со која се осудува руската инвазија на Украина, се голем предизвик за целиот свет.
Изјавите на Залужни доаѓаат по напната средба меѓу украинскиот претседател Володимир Зеленски и американскиот претседател Доналд Трамп во Белата куќа
Пред да победи на претседателските избори во САД минатата година, Трамп рече дека сака војната во Украина да заврши и дека ќе ја заврши многу брзо. Сепак, досега не му успеа во тоа. Во исто време, тој еднаш го нарече Зеленски диктатор и рече дека Украина ја започнала војната, пренесува Би-Би-Си.
Трамп неодамна одлучи да престане да испраќа воена помош за Украина.
Украина последователно се обиде да ги поправи своите нарушени односи со Америка, а Трамп за време на неодамнешното обраќање пред американскиот Конгрес рече дека Зеленски му испратил писмо во кое наведува дека е подготвен повторно да преговара за завршување на војната во Украина.
Тој стана почесен амбасадор на Украина во Обединетото Кралство во 2024 година. Претходно три години беше началник на Генералштабот на вооружените сили на Украина.