Десетици илјади Грузијци се собраа вечерва пред парламентот барајќи поништување на парламентарните избори одржани викендов.
– Не ги изгубивте изборите им порача претседателката Саломе Зурабишвили на толпата што вее знамиња на Грузија и на Европската Унија.
-Ти го украдоа гласот и се обидоа да ти ја украдат иднината, но никој нема право на тоа и нема да дозволиме никому да го направи тоа, додаде таа.
Зурабишвили најави дека ќе продолжи да го застапува патот кон Европската унија.
– Немаме алтернатива, сакаме да ја оставиме оваа земја на следните генерации, нагласи таа.
Лидерот на коалицијата Обединето национално движење Ѓорѓи Вашадзе изјави дека опозицијата нема да учествува во никакви преговори со власта и дека ќе се залага за нови избори под меѓународен надзор.
-Нема да влеземе во овој парламент. Ги отфрламе сите мандати. Нема да влегуваме во никакви преговори. Одиме да се бориме до победа и ви ветуваме дека заедно сигурно ќе победиме, изјави тој.
Во еден момент преку системот за јавно обраќање се свиреше Ода на радоста, химната на Европската унија.
Натија Чачава, една од оние кои излегоа на улиците завиткана во грузиското знаме, рече дека таа и толпата „не ја сакаат Русија или враќање во Советскиот Сојуз“. Студентката Лана Тогонидзе рече дека се надева оти Западот „ќе види дека грузискиот народ не стои зад оваа влада“.
Централната изборна комисија соопшти дека партијата Грузиски сон освоила 54,8 отсто од гласовите на изборите. Партијата, основана од Биџина Иванишвили, милијардер во сенка, кој се збогати во Русија, стана сè поавторитаристичка во текот на изминатата година, донесувајќи закони слични на оние што ги користеше Кремљ за сузбивање на слободата на говорот.
Зурабишвили смета дека протестот е единствениот начин на кој Грузијците можат „да изразат дека нивните гласови се украдени, дека нивната иднина е украдена“. Таа призна дека се надева оти Европската унија и САД ќе ги поддржат протестите.