„Некои земји од Западен Балкан чекаат 15 години за да влезат во ЕУ. Ова е лошо, можеби дури и понижувачко. Огромното мнозинство од земјите членки сакаат земјите од Западен Балкан, вклучително и Србија, да се приклучат на ЕУ што е можно поскоро, Унгарија ќе работи на тоа, изјави Унгарскиот премиер Виктор Орбан по разговорот со Емануел Макрон, додавајќи дека Франција ја поддржува унгарската програма за претстојното претседателство со Европската Унија и дека заедно ќе работат на проширувањето.
Орбан посочи и дека со Макрон разговарале за односите меѓу двете земји, актуелните прашања во ЕУ, како и за војната во Украина.
„Јасно му кажав на претседателот дека Унгарија не е ниту на страната на Украина ниту на Русија, туку се залага за мир“, рече тој.
Премиерот на Унгарија посочи дека со Макрон разговарал и за односите на Будимпешта со Кина и посочил дека Унгарија има избалансирани и добри односи со Пекинг. Кога станува збор за лидерските позиции во ЕУ, Орбан рече дека се одлучиле највисоките позиции, нагласувајќи дека сепак Унгарија секогаш била за вклучување на сите во европските одлуки.