Вршителот на должноста претседател на Косово, Вјоса Османи, во интервју за швајцарскиот весник „Ноје Цирхер Цајтунг“ изјави дека Белград мора да ја прифати реалноста и дека „суверенитетот на Косово“ не може да биде една од темите на преговарачката маса во процесот на дијалог меѓу Србија и Косово, известува „Денес“.
Османи, исто така, рече дека коалицискиот договор со Движењето Самоопределување предвидува да нема промена на границите, како и уставни измени, кои би биле неопходни за „проектот“ за обединување на Косово и Албанија.
„Се договоривме за приоритетите. На Косово сè уште има места кои немаат ниту вода за пиење ниту електрична енергија. Тоа е нашиот фокус. Што се однесува до Белград, тоа е прашање на препознавање на реалноста“, нагласи таа.
Има многу за разговор на преговарачката маса, но сигурно нема да се разговара за суверенитетот на Косово, заклучи Османи.