Косовската претседателка Вјоса Османи утринава се сретна со заменик-помошникот државен секретар на САД за Западен Балкан, Габриел Ескобар, со кого разговарале за најновиот развој на настаните во земјата и за процесите низ кои поминува Косово, пренесува „Репортери“.
„Разговаравме за последните случувања во нашата земја и процесите низ кои поминува Косово. Во секоја фаза од предизвикот, САД застанаа покрај Косово и ние сме им благодарни. Соработката со САД треба да биде оската на нашите активности. Соработката беше и останува од витално значење како во нашите бескомпромисни напори за обезбедување владеење на правото на целата територија на Косово, така и за зајакнување на меѓународната позиција на Косово. Соработката со сојузниците е од суштинско значење, особено сега кога Косово презеде клучна чекори кон членство во Советот на Европа“, истакна Османи.
На средбата, меѓу другото, се разговарало за безбедносните предизвици во Косово и за ‘терористичкиот’ напад во Бањска, за кој косовската претседателка верува дека Србија треба да ги екстрадира сите лица вклучени во планирањето, финансирањето и организирањето на нападот од 24 септември минатата година.
„Ќе продолжиме да ги применуваме највисоките стандарди за правично судење и да соработуваме со нашите сојузници, особено со САД, за нашата граница да биде безбедна и да спречиме такви напади во иднина“, додаде таа.
Во однос на дијалогот со Србија, Османи исткана на Ескобар му кажала оти успехот на овој процес зависи од принципиелниот и еднаков пристап на ЕУ кон двете страни.
„Од клучно значење е целосното спроведување на постигнатите договори, особено основниот договор од февруари 2023 година и Охридскиот анекс од март 2023. Селективниот пристап само кон одредени членови од основниот договор нема да помогне бидејќи важни се сите членови и имплементацијата мора да биде целосна, а не делумна. САД остануваат клучни за успешно завршување на процесот на дијалог што ќе доведе до меѓусебно признавање, како што беше споменато и во последното писмо на Бајден“, посочи Османи.