Осум љубители на снежните спортови ги загубија животите во три одделни лавини во северна Австрија во петокот и саботата, соопштија во саботата официјални извори.
Четворица Швеѓани и нивниот локален водич загинаа во петокот во провинцијата Тирол, во регионот Спис на границата со Швајцарија.
Шведски граѓани се движеле од патеката придружувани од планински водич кога над нив почнала да паѓа лавина широка 400 метри. Еден член од групата бил само делумно затрупан од снегот, па успеал да му се јави на својот пријател во Шведска на мобилниот телефон.
Човекот информирал лице кое исто така патувало со групата, но тој ден не се приклучил на турнејата. Веднаш биле известени спасувачките служби, а 42-годишниот Швеѓанец преживеал.
Властите во саботата објавија дека уште едно лице загинало во лавина во петокот на планината Кнеделкопф во провинцијата Форарлберг. Снегот затрупал човек додека тој и групата се движеле надвор од стандардните планински патеки.
Иако другите од групата успеале брзо да го извлечат од снегот и веднаш почнале со реанимација, мажот починал. Полицијата се уште не известила од каде е починатиот маж.
Во третата лавина загинаа две лица на возраст од 60 и 61 година. Тие беа пронајдени мртви нешто по полноќ во Вилдшенау, Тирол.
Според австрискиот систем за предупредување за лавини, постои огромен ризик од лавини во многу планински области во земјата. На скалата на ризик од пет точки, сите споменати области се на трето место по опасност.
Поради свежиот снег кој падна во четвртокот и петокот, само во Тирол се забележани десетици лавини, се наведува во соопштението на австрискиот систем за предупредување.