На инфективните одделенија во Скопје и останатите градови, вкупно се лекуваат 1082 пациенти позитивни или сомнителни на Ковид 19, додека останаа слободни 340 болнички капацитети, информираше Министерството за здравство.
Во последното деноноќие во ковид-центрите во Скопје се хоспитализирани 67 нови пациенти поради компликации од коронавирусот. Вкупно 463 лица сомнителни и потврдени за Ковид-19 се лекуваат на инфективните оддели во главниот град. Голем дел од пациентите се на кислородна поддршка.
Во ковид-центрите во болниците во другите градови во изминатите 24 часа е пријавено дека се лекуваат вкупно 619 пациенти позитивни и суспектни на коронавирусот.
Поради зголемениот број на пациенти кои имаат потреба од хоспитализација, во Скопје отворен е и кови центарот на Универзитетската клиника за трауматологија, ортопедски болести, анестезија, реанимација, интензивно лекување и ургентен центар (ТОАРИЛУЦ).
Во последното деноноќие, на Интерните клиники имало 35 приеми.
Во ковид центарот во ГОБ „8 Септември“ имало 18 примени пациенти и 12 биле примени на Инфективната клиника во текот на вчерашниот ден. Во Козле биле примени двајца нови пациенти.
Во изминатите 24 часа дома се пуштени 41 оздравен пациент. Во моментов во ковид – центрите на Интерните клиники и ТОАРИЛУЦ се лекуваат 221 пациент.
Во ГОБ „8 Септември“ има вкупно 74 болни, а на Клиниката за инфективни болести лежат 129 пациенти, додека во Иститутот за белодробни заболувања кај деца Козле има 35 пациенти. На ГАК има четири хоспитализирани ковид позитивни пациенти.
Бројот на приеми во изминативе денови е зголемен и изутрината до 8 часот имало 50 слободни места, а се очекува во тек на денот по направените исписи на оздравените пациенти да се ослободат и дополнителни места. Сите инфективни одделенија имаат довод на кислород и можат да згрижат пациенти кои имат потреба од кислородна подршка.
Во болницата во Битола се хоспитализирани 58 пациенти позитивни и суспектни на Ковид-19. Во болницата во Штип се хоспитализирани 46 пациенти. На инфективното одделение во Тетово има 22 пациенти, во Велес се лекуваат 50 болни, а во Куманово 92 пациенти позитивни и суспектни на Ковид-19. Во ковид – центарот во Охрид се хоспитализирани 90 пациенти, во Прилеп 89, во ковид – центарот во Гостивар 23, а во Струга 22 болни. Во болницата во Струмица хоспитализирани се 34 пациенти, во Кочани седум, во Кичево седум, Кавадарци 64, а во Гевгелија 15 лица, позитивни и суспектни на коронавирусот.
Во тек на денот се прават и исписи на оздравени пациенти со што ќе се ослободат дополнителни легла. Инаку, сите одделенија на клиничките болници располагаат со болнички места до кои има довод на кислород. Министерството има увид во состојбата со капацитети и доколку има потреба одделенијата ќе бидат дополнително проширени, се додава во соопштението.