Холандија се подготвува да го промени пензискиот систем и да воведе флексибилна исплата на пензиите, поврзувајќи го нивниот износ со инвестициските резултати.
Холандските работници и нивните работодавци плаќаат придонес во приватните пензиски фондови кои им гарантираат точен износ на пензија.
Ваквиот систем, заедно со државниот пензиски фонд, на работниците им гарантираше пензија која беше само малку помала од нивната плата, но во последните години се соочуваше со тешкотии бидејќи каматните стапки и придонесите беа премногу ниски за да ги одржуваат пензиите во согласност со инфлацијата.
Ситуацијата дополнително се искомплицира со влошувањето на односот на средствата и обврските на фондовите, што поттикна дебата меѓу пензионерите и работниците за правата за плаќање. Пензионерите бараат прилагодување на пензиите за инфлацијата, а работниците предупредуваат дека тоа ќе им наштети на нивните идни бенефиции.
По неколку години дискусија, холандскиот Сенат во вторникот ја одобри транзицијата кон системот „дефиниран придонес“. Според новите прописи, околу 180 холандски пензиски фондови ќе им кажат на работниците и пензионерите точно колкав е нивниот удел во заедничкиот фонд и какви придобивки реално може да очекуваат.
Новиот систем ќе им олесни и на фондовите да плаќаат поголеми износи на пензии и бенефиции во случај на подобри инвестициски резултати или помали суми во случај на послаб принос. Сепак, планот вклучува и механизми за солидарност со цел да се ублажи влијанието на „лошите“ години и да се обезбеди исплата на пензиите до крајот на животот. Новите прописи ќе стапат во сила до 2028 година.