„Prahran Hotel“ е паб со впечатлив дизајн, креативно скроен на два ката во зграда со аеродинамична арт деко фасада. Неговата обнова, изведена од архитектонската фирма „Techné Architects“, се заснова на синхронизирање на доградбата со оригиналната фасада во доцен арт деко стил.
Бетонските цевки од кои е изведена фасадата го формираат карактерот на целиот објект. Мултифункционалноста и индустрискиот изглед на бетонските цевки се главната причина што архитектите се одлучуваат за овој материјал за изведба на фасадата и дизајнот на доградениот дел. Како што самите велат во описот на проектот, бетонските цевки имаат длабочина и може да бидат интерактивни за гостите, имаат драматичен скулптурален ефект и потсетуваат на буриња за пиво, што ја потенцира главната дејност на пабот. Наредени едни врз други, цевките, исто така, внимателно откриваат и скриваат дел од ентериерот на ресторанот, привлекувајќи погледи од случајните минувачи.
Ентериерот е подеднакво интересен како и екстериерот. При реновирањето на зградата, дел од просторот е уреден како внатрешен двор низ кој лесно и природно влегува светлина и го осветлува целиот објект. Дворот е уреден со мебел изработен од железо со зелена и со бела боја, палета што природно се вклопува со растителниот свет. Во внатрешноста е инсталирана лебдечка структура изработена од половина цевка што е издигната над земјата со помош на железни потпорници.
Низ целиот објект провејува индустриска атмосфера. Она што му контрастира на студенилото на железните и на бетонските структури е топлината на кожениот мебел и свежината на зеленилото поставено низ целиот ентериер. Просториите на пабот се подредени да одговараат и за поинтимна, но и за повесела друштвена атмосфера за поголеми групи посетители. Гостите може да седат во и на бетонските цевки, како и да се качуваат по нив за да стигнат до вториот кат.
