Во време кога сè поголем број производители на спортски автомобили ги намалуваат своите мотори и ја прифаќаат електрификацијата, Pagani воопшто не е заинтересиран за тој тренд. Нивниот најнов модел, Utopia, има „сиров“ 6.0 литарски V12 со двоен турбо полнач мотор на Mercedes без никакви хибридни додатоци. Тоа е затоа што нејзините клиенти не сакаат хибрид, тврди Хорацио Пагани, основачот и директор на оваа италијанска компанија, која во последните децении се наметна со своите фасцинантни хиперавтомобили.
Со ретки исклучоци, повеќето нови хиперавтомобили и суперавтомобили денес се хибриди. Некои мислат дека овие решенија го комбинираат најдоброто од двата света, подобрувајќи ги перформансите и ефикасноста. Но, Пагани смета дека хибридните системи се целосно губење време за неговата компанија, пренесe „Јутарњи“.
„Во реалноста, никој не е заинтересиран за хибриден автомобил“, изјави Пагани за The Drive во неодамнешното интервју на промоцијата на Utopia Roadster во САД. „Имам хибриди во мојата колекција, имам Porsche 918 и уште неколку. Но, кога ќе дојде време да возам Porshe, ќе го земам мојот 911R или Carrera GT. Нашите клиенти размислуваат во таа насока“.
„Верувам дека ако ги прашате луѓето, повеќето од нив ќе кажат дека хибридот е нешто посебно бидејќи ги има сите проблеми на електричен автомобил и сите проблеми на автомобил со мотор со внатрешно согорување заедно со повисоки трошоци за развој и одржување“, додаде Пагани.
Pagani во минатото сериозно размислуваше за хибриден погон и електрично возило, но веруваат дека времето сè уште не е. Според Хорасио, мал бизнис не може да си дозволи да изгради нешто што клиентите не го сакаат. Исто така, не може да бара од голема матична компанија да и обезбеди нови технологии.
„Размислувавме за хибриден V8, но автомобилот беше едноставно премногу тежок, 400 или 500 килограми повеќе, а нашите клиенти не сакаа да имаат нешто со тоа“, откри Пагани.
„Мораме да го произведеме она што клиентот ќе го купи од нас. Во 2017 година создадовме тим за работа на електрични возила. Тимот беше фокусиран и возбуден, вклучително и јас. Го дефиниравме концептот за овој автомобил и почнавме да работиме со Mercedes-AMG и други партнери. Дури почнавме да работиме со Lucid, кој има исклучителна технологија во светот на електричните возила. Но, тогаш се случи ова: купувачите едноставно не беа заинтересирани“, додаде Пагани.
Италијанската компанија нема намера во скоро време да се збогува со V12 моторот. Огромниот 6-литарски твин-турбо агрегат на Utopia е хомологиран до 2031 година, што значи дека ќе се произведува уште долго.