Во високо ризична операција поради силни ветришта, пакистанската војска денеска спаси четири деца од осум лица заробени во жичница што виси над длабока бездна откако се скина кабел.
Седум ученици и еден наставник останале заглавени во жичницата од 7 часот наутро додека патувале на училиште во оддалечената планинска област Батаграм, околу 200 километри северно од Исламабад, соопштија властите.
Две деца се спасени, изјави портпаролот на агенцијата за спасување и претставник на областа. Операцијата продолжува, а засега нема други детали.
„Жичницата останала да виси од една сајла, откако другата се откинала на половина пат преку провалија на 274 метри над земјата. Спасувачката мисија е отежната поради бурните ветрови во областа и фактот дека лопатките на роторот на хеликоптерот може дополнително да ја дестабилизираат кабината на жичарницата, изјави Ријаз Катак, претставник на спасувачката служба.
„Нашата ситуација е неизвесна, направете нешто…“, рекол преку телефон за локален телевизиски канал, 20-годишниот Гулфараз, кој се наоѓа во кабината на жичницата, апелирајќи до властите да ги спасат што е можно поскоро.
Тој рече дека останатите ученици се на возраст од 10 до 15 години, а еден се онесвестил од жештината и стравот.