Британскиот премиер Кеир Стармер и францускиот претседател Емануел Макрон преговараат со 37 земји за создавање на „коалиција на волните“ за Украина во случај на мировен договор, дознава Блумберг.
Имено, како што пишува медиумот, Обединетото Кралство и Франција настојуваат да ја зајакнат позицијата на Украина во преговорите, додека американскиот претседател Доналд Трамп бара спогодба во руско-украинската војна. Две европски нуклеарни сили развиваат план за да помогнат во обезбедувањето на безбедноста на Украина.
„Коалицијата на подготвените“ ќе вклучи земји од Европа, Комонвелтот и Азија, кои нудат средства, војници, авиони или поморски бродови за да помогнат во заштитата на Украина од понатамошна руска агресија, според Блумберг.
На одделен состанок во Париз во вторникот, земјите кои не се членки на НАТО, како Австралија, Јапонија и Нов Зеланд, се приклучија на разговорите со воените лидери од десетици европски земји и Канада, објави Блумберг, повикувајќи се на анонимни извори.
Од секоја земја беше побарано да каже каков придонес се спремни да дадат. Оние кои не сакаа да испратат војници во Украина беа прашани дали ќе распоредат сили во соседните европски земји или ќе дадат други форми на поддршка, вклучувајќи бродови за чистење мини, чамци, авиони, тенкови и разузнавачки информации.
Воените лидери во наредните денови ќе ги претстават деталните опции за мировни сили во Украина на Стармер и Макрон. Овие опции ќе бидат разгледани со други светски лидери за време на виртуелна конференција овој викенд, тврди Блумберг.