Кина ги обвини САД за, како што рече, „пат-позицијата“ во билатералните односи, додека во кинескиот град Тијанџин започнаа разговори на високо ниво.

На состанокот со висок американски официјален претставник во понеделникот, кинескиот заменик министер за надворешни работи Кси Фенг го повика Вашингтон „да го смени своето многу погрешно размислување и опасната политика“, објави новинската агенција Синхуа.

Подоцна денеска, Венди Шерман треба да се состане и со министерот за надворешни работи Ванг Ји.

Таа е највисокиот официјален претставник на САД што ја посетила Кина откако претседателот Џо Бајден ја презеде функцијата пред шест месеци.

Односите меѓу земјите нагло се влошија за време на претходникот на Бајден, претседателот Доналд Трамп, а двете страни продолжуваат да се судираат за низа прашања, вклучувајќи ги човековите права, Хонг Конг, Ксинџијанг, технологијата и низа други прашања.

„Добрата вест е што двете страни седат и разговараат“, рече репортерот на Ал Џезира, Адријан Браун, известувајќи од Хонг Конг, но додаде дека врските меѓу двете земји сè уште се во слободен пад.

„Она што Венди Шерман може да го стори е да се обиде да види дали има начин да ги подобри тие врски. Исто така, за неколку месеци во Рим, самитот на Г-20 ќе се одржи и невозможно е да се замисли дека претседателот Бајден и претседателот Си Џинпинг не би седеле во такво опкружување и да разговараат. Значи, сегашните разговори се на начин насочен кон трасирање на патот за таа средба“.

Ден пред да пристигне Шерман, Ванг рече дека Кина нема да прифати САД да заземат „супериорна“ позиција во комуникациите.

„Кина никогаш не би прифатила која било земја што тврди дека е супериорна во однос на другите“, изјави Ванг за кинеската телевизија Феникс.

„Доколку Соединетите држави не научиле да се однесуваат еднакво кон другите земји, Кина и меѓународната заедница мора да им помогнат на САД да научат како да го сторат тоа“, истакна тој.

Шерман, која пристигна во неделата вечерта од Монголија, на Твитер објави „искрено сочувство“ (од Соединетите држави) до оние кои ги изгубија своите најблиски „во силното невреме и поплавите минатата недела, во кои загинаа најмалку 63 лица во провинцијата Хенан.

Странските медиуми беа држени подалеку од хотелот каде се одвиваа разговорите меѓу американската и кинеската делегација, но на кинеските медиуми им беше дозволено да останат во хотелот.