Претседателката на Претставничкиот дом на американскиот Конгрес, Ненси Пелоси, денеска потврди дека е на пат за Азија, без да спомене можна посета на Тајван, што може дополнително да ги заостри односите меѓу Кина и САД.
„Водам делегација на Конгресот во индо-пацифичкиот регион за да ја потврдам непоколебливата посветеност на Америка кон сојузниците и пријателите во регионот“, рече Пелоси во соопштението.
„Во Сингапур, Малезија, Јужна Кореја и Јапонија, ќе имаме состаноци на високо ниво за да разговараме за тоа како можеме да ги промовираме нашите заеднички вредности и интереси, поврзани со мирот и безбедноста, економскиот раст и трговијата, пандемијата Ковид-19, климатска криза, човекови права и демократско владеење“, додаде таа.
Министерството за надворешни работи на Сингапур потврди дека Пелоси и нејзината придружна делегација ќе бидат во градот-држава на 1 и 2 август.
Таа не кажа ништо за можна посета на Тајван, наведувајќи безбедносни причини.
Тензиите меѓу САД и Кина се зголемуваат со недели по извештаите дека тие би можеле да го посетат автономниот остров што Кина го смета за дел од својата територија.
Пекинг би ја сметал нејзината посета, колку и да е кратка, како провокација.
Портпаролот на кинеската армија Шен Џинке денеска го повтори тој став и рече дека одбраната на кинеската територија е „света мисија“ на армијата.
Во четвртокот, во телефонски разговор со кинескиот претседател Си Џинпинг, американскиот претседател Џозеф Бајден увери дека позицијата на САД за Тајван не е променета, но исто така рече дека неговата земја цврсто се противи на едностраните напори за промена на статусот или загрозување на мирот и стабилноста во Тајванскиот теснец.
Вашингтон нема дипломатски односи со Тајпеј и ги признава комунистичките власти во Пекинг како единствени претставници на Кина, но САД продаваат оружје на островот и ја фалат неговата „демократска“ влада.
Од друга страна, Си Џинпинг му порача на Бајден да не си „игра со оган“, а портпаролот на кинеското Министерство за надворешни работи го нарече заминувањето на Пелоси во Тајван „црвена линија“.
Посетата на Ненси Пелоси доаѓа во време кога во регионот растат воените тензии.
Војската на Тајван оваа недела ги спроведе своите најголеми годишни воени вежби, кои вклучуваат симулирање на пресретнување на кинески напади од море.
Во исто време, американскиот носач на авиони Роналд Реган и неговата флотила го напуштија Сингапур и се упатија кон Јужното Кинеско Море како дел од претходно планираната операција.
Вчера Кина организираше воена вежба со боева муниција во Тајванскиот теснец.