Портпаролот на Кремљ, Дмитриј Песков денеска изјави дека комуникациските терминали на Starlink не се сертифицирани во Русија и затоа не можат официјално да бидат испорачани во Москва и да се користат.
„Овој систем не е сертифициран овде во Русија, така што не може официјално да биде испорачан овде и не е испорачан. Тоа значи дека не може да се користи официјално на кој било начин“, изјави Песков на новинарите на прашањето за потенцијалното користење на Starlink во Русија, пренесува ТАСС.
Американскиот милијардер и претприемач Елон Маск претходно изјави дека сателитските комуникациски терминали на Starlink развиени од неговата компанија SpaceX никогаш не биле продадени на Русија и ги демантираше извештаите на медиумите, повикувајќи се на извори од украинската војска дека руските сили наводно ги користат тие терминали.
SpaceX ѝ обезбеди на Украина свои Starlnk терминали, кои се нашироко користени од украинските војници за контрола на дронови.
И покрај тоа, Маск во неколку наврати ја изрази својата поддршка за решавање на конфликтот во Украина по дипломатски пат.