Во рамките на петтиот пакет кој, како и претходните четири ќе се донесе по исцрпна консултација со сите чинители во општеството, стопанствениците, работодавачите и на работниците, синдикатите и на други засегнати страни се разгледуваат два модела за поддршка за исплата на плати, истакна вицепремиерот за економски прашања Фатмир Битиќи на ТВ 24, додавајќи дека едниот е тој што се применува сега.
Во месец април финансиска поддршка за плати е исплатена на 128.000 корисници, односно на околу 21.000 компании, а во декември лани се дадени 60.000 плати, на 10-11 000 компании и самостојни вршители на дејност, при што за да бидеме конзистентни користевме исти критериуми, рече Битиќи.
„Сега нудиме нов модел преку развојна банка за финансиска поддршка за плати, преку кредити со 0 посто камата, каматата ја субвенционира државата, им даваме на компаниите 12 месеци грејс период и отплата од 3 години, под услови ако покажат негативни резултати да го враќаат кредитот, ама ако покажат позитивни резултати 30% од средствата стануваат грант, што оди во прилог на рестартирање на економијата, посочи Вицепремиерот.
Двата модела се на маса ќе преовлада оној што ќе ги даде најдобрите резултати, додаде тој.