Платформата Х на американскиот милијардер Елон Маск одобрила претплата на одредени терористички групи чии активности се забранети во САД, соопшти групата Tech Transparency Project (TTP), група која следи и критикува различни активности на социјалните мрежи.
TTP соопшти дека открила дека платформата Х доделила сини значки на профили поврзани со членовите на либанската терористичка група Хезболах, меѓу другите, објави Би-Би-Си.
TTP истакна дека претплатата се чини дека ја платил водачот на јеменските бунтовници Хути и дека сината значка сега е отстранета од тој профил.
Според извештаите, тој профил има повеќе од 23.000 следбеници.
Хутите се под санкции и во САД и во Велика Британија поради напади врз трговски бродови во Црвеното Море.
TTP идентификуваше други сметки кои имаа платена претплата, вклучително и една на НТВ, државен телевизиски канал во Русија.
Претплатата од осум долари месечно, означена на сметките со сина значка, овозможува подолги објави и подобра промоција.
По објавувањето на извештајот на TTP, платформата Х ги отстрани сините значки од одредени профили.
Одлуката на Маск да воведе претплати беше една од најконтроверзните промени што ги направи откако го купи „Твитер“ во 2022 година.
Профилите со сина значка претходно беа бесплатни, што требаше да укаже дека платформата за социјални медиуми го потврдила идентитетот на сметките, главно новинари, светски лидери и познати личности.