Турција купува сè помалку руска нафта откако САД објавија санкции врз Лукоил и Роснефт, изјавија извори за Ројтерс.
Од почетокот на руската инвазија на Украина и последователните европски санкции, Турција стана трет најголем купувач на руска нафта по Индија и Кина. Во првите 10 месеци од оваа година, земјата увезе околу 669.000 барели дневно, од кои 317.000 – или 47% – од Русија.
Сега турските компании го следат примерот на Индија со тоа што се свртуваат кон алтернативни извори на суровини, објавува Ројтерс.
Компанија која поседува две од најголемите рафинерии во Турција за прв пат направи нарачки кај производителите во Бразил и Ангола. Барем една од овие рафинерии ќе работи целосно на неруска нафта за да може да продолжи да извезува во Европа откако новите европски санкции ќе стапат на сила во јануари.
Друга голема турска рафинерија, во сопственост на азербејџанската компанија СОКАР, купувала само руска нафта во последните два месеци, но нарачала за декември од Казахстан, Ирак и други земји, според неименувани индустриски извори цитирани од Ројтерс.