Полска одлучи да го изостави унгарскиот амбасадор од листата на поканети на настанот по повод почетокот на полското претседавање со Европската унија во петокот, бесна поради тоа што Будимпешта му даде азил на поранешен заменик министер под истрага за злоупотреба на јавни средства, пренесува Хина.
Унгарскиот премиер Виктор Орбан исто така не беше поканет на церемонијата во Варшавскиот театар Бољшој, изјави заменик-министерката за европски прашања Магдалена Собковиак-Чарнечка.
Варшава жестоко реагираше кога Унгарија минатиот месец му даде азил на Марцин Романовски, поранешен заменик-министер за правда на Полска, кој беше приведен во јули минатата година како дел од истрагата за злоупотреба на јавните средства.
Романовски брзо беше ослободен откако претседателот на Парламентарното собрание на Советот на Европа (ПССЕ) потврди дека има имунитет како член на тоа тело. Поранешниот заменик министер ги отфрла обвинувањата.
„Кога ги поканивме гостите на нашата церемонија пред речиси еден месец, го поканивме целиот дипломатски кор“, рече Собковиак-Чарнецка во петокот.
„Меѓутоа, по ситуацијата со министерот Романовски, министерот за надворешни работи Шикорски одлучи унгарскиот амбасадор да не е добредојден гостин во нашиот театар денес“, додаде таа.
Полскиот премиер Доналд Туск и Антонио Коста, претседател на Европскиот совет, ќе зборуваат на настанот со кој започнува шестмесечното полско претседавање со ЕУ.
Варшава, главен сојузник на Будимпешта за време на претходната конзервативна влада, го презема претседателството од Унгарија.
Туск претходно го критикуваше Орбан за голем број прашања, како што е неговиот став за војната во Украина и политиката што Варшава ја смета за проруска.
Орбан за унгарските медиуми изјави дека владата на Туск ги смета Унгарците за непријатели.