Заменик-министерот за надворешни работи на Полска, Анджеј Шејна, му врачи денеска дипломатска нота на амбасадорот на Израел во Варшава, Јаков Ливне, во знак на протест поради убиството на полскиот хуманитарен работник во израелски напад врз конвој со хуманитарни работници во Појасот Газа на почетокот од неделава, пренесува „Би-би-си“.
По средбата, Шејна истакна дека му врачил протестна нота на амбасадорот Ливне кој бил повикан поради смртта на хуманитарците од „Светската централна кујна“, меѓу кои и 35-годишниот Полјак Дамијан Собол и дека амбасадорот се извинил.
„Амбасадорот на почетокот се извини за овој настан без преседан во историјата на цивилизираниот свет, а тоа е бомбардирање на автомобил во хуманитарен конвој кој носи хуманитарна помош во Појасот Газа погоден од глад“, рече Шејна, истакнувајќи дека Ливне нема да биде протеран од земјата.
Шејна рече дека Полска очекува транспарентна истрага и компензација за семејството на жртвата ако тоа го сака истото.
Амбасадорот Ливне рече дека на средбата изразил „длабока тага и искрено извинување“ за смртта на вработените од „Светската централна кујна“, вклучително и полскиот државјанин.
„Искрено ја споделуваме тагата на семејствата. Го уверив заменик-министерот дека Израел е целосно посветен на транспарентна и темелна истрага на оваа тешка трагедија“, напиша Ливне на социјалните мрежи.
Ливне беше жестоко критикуван за неговата реакција на нивната смрт зашто и покрај постојаните изрази на длабоко жалење за нападот, тој ги отфрли обвинувањата дека нападот претставува воено злосторство.
Амбасадорот го обвини полскиот потпретседател на крајнодесничарскиот парламент, Кшиштоф Босак, дека е антисемит поради таквото обвинение. Полскиот претседател Анджеј Дуда го нарече амбасадорот Ливне најголем проблем за односите на двете земји.
Израелската војска денеска соопшти дека отпуштила двајца офицери и укорила на уште тројца за нивната вмешаност во нападите со беспилотни летала во Газа, во кои загинаа седум хуманитарни работници во мисија за испорака на храна, велејќи дека тие лошо постапувале со критични информации и ги прекршиле армиските правила за ангажман.