На светските берзи цените на нафтата паднаа и минатата недела, четврти пат по ред, бидејќи трговците стравуваат дека побарувачката за „црното злато“ ќе ослабне поради забавувањето на растот на најголемите светски економии.
Цената на барелот на лондонскиот пазар минатата недела падна за 1,5 отсто, на 74,17 долари, додека на американскиот пазар барелот падна за 1,8 отсто, на 70,04 долари.
Серија неодамнешни податоци покажуваат дека закрепнувањето на кинеската економија, најголемиот увозник на нафта во светот, не е толку брзо како што се очекуваше по укинувањето на рестриктивните мерки за коронавирусот.
Од друга страна, растот на американската економија, најголемиот светски потрошувач на нафта, забавува веќе подолго време, бидејќи централната банка на земјата веќе една година ги зголемува каматните стапки за да ја спречи инфлацијата.
Можно е натамошно зголемување на каматите, што дополнително би ги забавило активностите во економијата. Така, во петокот, гувернерката на ФЕД, Мишел Бауман, рече дека централната банка можеби ќе треба уште еднаш да ги зголеми каматните стапки доколку инфлацијата остане покачена.
На цената на нафтата негативно влијаеше и зајакнувањето на американскиот долар, бидејќи тоа ја поскапува нафтата во земјите кои користат други валути.
Индексот на доларот, кој го покажува движењето на американскиот долар во однос на другите шест главни светски валути, минатата недела се зголеми за 1,4 отсто, што е негова најголема неделна добивка од февруари.
Од друга страна, цените се поддржани од прогнозите на аналитичарите дека дефицитот во понудата на нафта може да се продлабочи во втората половина од годината.
Аналитичарите се повикуваат на оценката на Организацијата на земјите извознички на нафта (ОПЕК) дека побарувачката за нејзината нафта во втората половина од годината би можела да биде за 90.000 барели дневно повисока отколку што прогнозираа досега.
„Пазарот на нафта се приближува до дефицит на понудата, под претпоставка дека ОПЕК дополнително ќе го намали производството како што беше најавено“, рече Стивен Бренок од PVM.
ОПЕК одлучи да го намали производството за дополнителни 1,16 милиони барели дневно од мај до крајот на годината за да ги поддржи цените.
По падот четири недели по ред, цените на нафтата се во значителен дефицит од почетокот на годината. Во споредба со почетокот на годината, цената на барелот на лондонскиот пазар падна за повеќе од 13 отсто, а на американскиот пазар за повеќе од 12 отсто.