Пилотот кој во понеделникот загина во авионска несреќа во областа Велика Планина во Словенија е контроверзниот 64-годишен шведски бизнисмен и поранешен политичар Карл Лундстром, пишува 24ur.
Бизнисменот и член на шведската екстремно десничарска партија Алтернатива за Шведска, која ја потврди неговата смрт, во 2009 година беше осуден на една година затвор и исплата на отштета за помагање и поттикнување кршење на авторските права во врска со пиратската веб-страница за бесплатно преземање содржини The Pirate Bay, пишува шведскиот портал Expressen. Неговата одговорност за отштета подоцна изнесуваше речиси 8 милиони евра.
Ко-сопственикот на страницата обезбедувал технички услуги за The Pirate Bay преку неговата компанија.
Лундстром, кој, меѓу другото, го негираше Холокаустот, пишувајќи на Фејсбук „дека нацистичка Германија систематски не се обидувала да ги убие затворениците во концентрационите логори“, се приклучи на партијата Алтернатива за Шведска кога беше основана во 2018 година.
Како што соопшти партијата по загубата на својот член, тој претходно ги поддржувал националистичките движења и одиграл важна улога во имиграцискиот референдум од 1988 година, кој го забрани прифаќањето бегалци во шведската општина Сјобо.
„Она што ја прави оваа трагедија уште поневеројатна е тоа што требаше да се видиме викендов. Јас и многу други планиравме да се сретнеме со Карл во Сент Мориц, Швајцарија. И покрај лошите временски услови, тој реши да земе сопствен спортски авион и да лета на Алпите – патување што го правеше многу пати претходно. Тој беше искусен пилот и секогаш педантен за безбедноста, што ја прави несреќата уште помалку разбирлива“, напиша неговиот пријател Кристијан Петерсон на својот блог.
Лундстром се преселил во Швајцарија во 2008 година, а од деловни причини последниот период од животот го поминал главно меѓу Швајцарија и Хрватска, од каде последен пат полетал во понеделникот, пишува Слободна Далмација.