Корисниците на Pornhub, YouPorn и RedTube во Франција повеќе нема да можат да пристапат до нивната содржина почнувајќи од денес – наместо тоа, ќе бидат пречекани со политичка порака. Драстичната мерка е одговор од компанијата Aylo, сопственик на платформите, на новиот француски закон кој бара построга проверка на возраста за посетителите на страниците за возрасни
„Одлучивме привремено да го суспендираме пристапот до сите наши кориснички платформи во Франција. Ќе ги користиме за директно обраќање до јавноста“, изјави портпаролот на Pornhub. Францускиот закон, воведен на почетокот на годината, бара од сите порнографски платформи да потврдат дека корисниците се над 18 години користејќи кредитна картичка, лична карта или систем од трета страна што го штити идентитетот на корисникот.
Но, Aylo предупредува дека овој пристап е неефикасен и опасен за приватноста. Соломон Фридман од Ethical Capital Partners, компанијата зад Aylo, тврди дека податоците на корисниците се изложени на ризик од хакирање и злоупотреба и предлага алтернативен пристап: проверка на возраста преку оперативни системи како оние што ги користат Apple, Google и Microsoft.
„Не треба да се сметаат за одговорни порнографските страници“, рече Фридман. „Оперативните системи веќе имаат технологија што може да ја потврди возраста на корисникот – без да открива чувствителни податоци“. Компанијата нагласува дека не е против проверка на возраста. Всушност, „ние многу силно ја поддржуваме идејата за заштита на малолетниците“, рече директорот на Aylo, Алекс Кекеси. „Но, не на начин што ги уништува основните права на приватност“, тврди таа, објавува „Гардијан“.
Од друга страна, француските власти ја поздравија одлуката на платформата да се повлече. Министерката за култура, Аурора Берже, коментираше дека ова ќе значи помалку насилна и понижувачка содржина достапна за малолетниците. Државниот секретар за вештачка интелигенција и дигитални технологии, Клара Чапаз, реагираше слично, велејќи дека Aylo е слободен да ја напушти Франција ако не сака да го почитува законот.
Податоците од францускиот регулатор Arcom покажуваат дека дури 2,3 милиони малолетни корисници пристапуваат до порнографски страници месечно, иако ова треба да биде спречено со закон. Законот, исто така, налага таканаречена двојно слепа проверка од трета страна, што би ја заштитило приватноста на корисникот. Но, Aylo предупредува дека овој систем не е доволно технички сигурен и дека во пракса отвора врата за надзор и злоупотреба.
За дополнителен протестен ефект, пораката дека Aylo ќе ги пречека француските корисници е илустрирана со сликата „Слободата го води народот“ од Ежен Делакроа – симбол на отпор, но и на контроверзии, бидејќи прикажува алегориска фигура на слободата со голи гради.
Во меѓувреме, Европската Унија го зголемува притисокот врз порнографските платформи. Регулаторите најавија истраги за неколку од нив, вклучувајќи го и Pornhub, за можни прекршувања на правилата за заштита на децата.