Заменик-претседателот на Владата задолжен за економски прашања, координација на економските ресори и инвестиции, Фатмир Битиќи, заедно со министерот за локална самоуправа, Ристо Пенов и директорот на Бирото за регионален развој, Рамиз Реџепи денеска присуствуваа на потпишувањето на договорите за реализација на проектите за развој на планските региони со средства обезбедени од Програмата за рамномерен регионален развој за 2022 година.
Програмата предвидува реализација на 29 развојни проекти во осумте плански региони на Република Северна Македонија, во вкупен износ од над 422 милиони денари.
Во пресрет на потпишувањето на договорите, вицепремиерот Битиќи изрази задоволство што се пристапува кон финализирање на Одлуката на Владата за финансирање на проектите за развој на планските региони за 2022 година. „Целта е развој на нашата земја и се надевам дека овие средства, кои денес ќе бидат распределени за секој поединечен проект, ќе бидат максимално, одговорно и свесно искористени,“ истакна Битиќи. Тој им посака успех на носителите на проектите и изрази уверување дека Бирото за регионален развој доследно ќе го следи процесот на нивна реализација.
Концептот на рамномерен регионален развој предвидува континуирана финансиска поддршка од страна на државата и висок степен на координација помеѓу министерствата, донаторите и засегнатите страни на регионално и на локално ниво.
Политиката за рамномерен регионален развој е високо позиционирана меѓу приоритетите на Владата на Република Северна Македонија, а нејзината цел е подобрување на благосостојбата на регионите, намалување на регионалните нерамномерности и подобрување на квалитетот на живеење на граѓаните преку остварување на рамномерен и одржлив развој на целата територија на државата.