Иако медиумите оваа година се преполни со лоши вести за индустријата за електрични автомобили, се чини дека не е се така црно како што изгледа во моментов. Едно ново истражување покажува дека повеќето луѓе сакаат електрични автомобили.
Новото истражување на консултантската компанија Accenture открива дека преференциите на клиентите се префрлаат кон електрични возила повеќе отколку што може да изгледа на прв поглед. Во ова истражување биле анкетирани 6.000 возачи на автомобили од САД, Германија, Италија, Франција, Кина и Јапонија.
Како што пренесува „Јутарњи“, истражувањето покажало дека 57 отсто од возачите очекуваат да поседуваат електрично возило во следните 10 години, а само 10 отсто од купувачите тврдат дека никогаш не би купиле електрично возило. Во Кина расположението кон електричните автомобили е најпозитивно и дури 65 отсто од анкетираните возачи сметаат дека иднината им припаѓа на електричните автомобили.
Во САД, 54 отсто од анкетираните возачи изјавиле дека очекуваат да поседуваат електрично возило во следните 10 години, а само 11 отсто рекле дека никогаш нема да купат автомобил на батерии.
Германските и француските испитаници се поскептични за електричната иднина со 37 отсто, односно 36 отсто од возачите, кои мислат дека ќе купат електричен автомобил во следните 10 години.
Во анкетата, мнозинството од испитаниците истакнале дека приоритети поврзани со електричните возила се доверливоста (83%), безбедноста (82%) и вредноста за парите (82%). Исто така, 70 отсто од анкетираните го истакнуваат полнењето како важна ставка, а 81 отсто ја сметаат големината и опсегот на батеријата како важен фактор при купување електрично возило.
Сите овие резултати се добра слика за моменталната состојба на пазарот. Во текот на оваа година, Германија забележа голем пад во продажбата на електрични возила, додека продажбата во Кина продолжува да расте. Продажбата на електрични возила расте и во Европа, но со многу побавно темпо од претходно. Во САД, ситуацијата со електричните автомобили е нешто подобра.