Од воведувањето на еврото во 2002 година, монетарниот систем на повеќето европски земји стана единствен. Нумизматичарите одамна знаат дека постојат ретки колекционерски или комеморативни монети кои вреди да се зачуваат.
Ваквите ретки примероци многу брзо можат да вредат и неколку илјади евра, како што е највредната монета од две евра од Монако, која го прикажува портретот на актерката Грејс Кели, а се вели дека вреди три илјади евра.
Иако овие комеморативни монети можат да се користат како платежно средство во рамките на Европската унија, тие обично се издаваат во мали серии, што ги прави многу привлечни за колекционерите, пишува „fenix-magazine“.
Португалија најави дека во чест на познатиот португалски спортист ќе пушти во продажба нова комеморативна монета, монета од седум евра, која всушност вреди 7,50 евра.
Се разбира, станува збор за Кристијано Роналдо, кој е роден на Мадеира, португалски архипелаг во Атлантикот. 39-годишниот играч има постигнато вкупно 130 голови за португалската репрезентација и моментално ја предводи листата на најдобри стрелци на УЕФА на сите времиња. Сега фудбалерот е почестен со сопствена монета.
Монетата од седум евра е посветена на бројот на дресот на Роналдо.
Португалската централна банка објави дека ќе ја пушти монетата во ограничено издание од само 25.000 примероци. Може да се купи само во Португалија и преку „Banco de Portugal“, пишува италијанскиот весник „La Gazzetta di Viareggio“.
Дали оваа специјална монета ќе стигне на пазарот во други земји, како Германија, се уште не е познато. Сегашната продажна цена е околу 12,50 евра, но поради ограничениот број на примероци, вредноста наскоро би можела значително да се зголеми.