Групата на социјалисти и демократи, втора по бројот на европратеници во Европскиот парламент, го поздрави наметнувањето санкции врз директорот на БИА Александар Вулин од страна на САД и ја повика ЕУ да го стори истото.
„Ја поздравуваме одлуката на САД да го санкционираат Александар Вулин – директор на српската безбедносно-информативна агенција, поранешен министер за одбрана и внатрешни работи и експонент на Путин во Србија“, објави групата на Твитер.
Да потсетиме, САД донесоа одлука да воведат санкции за Александар Вулин, кој е познат како марионета на официјална Москва, пренесе „Нова.рс“.
We welcome the US 🇺🇸 decision to sanction Aleksandar Vulin – Director of Serbia’s Security Intelligence Agency, ex defence minister & interior minister, and Putin’s proxy in Serbia.
The EU should follow suit! pic.twitter.com/Uuv8PzbDGx
— S&D Group (@TheProgressives) July 13, 2023
Како што се наведува во образложението на одлуката, Вулин е вмешан во „меѓународен организиран криминал, нелегална трговија со дрога и злоупотреба на јавна функција“.
„Постапките на Вулин промовираа корупција во владините институции во Србија. Овие дела вклучуваат користење на неговиот авторитет за лична корист, вклучително и вмешаност во синџир за трговија со дрога. Тој ги искористи своите јавни позиции за да ја поддржи Русија, овозможувајќи го малигното влијание на Русија, а со тоа ја намалува безбедноста и стабилноста на Западен Балкан и ѝ обезбеди на Русија платформа за дополнително да го прошири своето влијание во регионот“, се вели на веб-страницата на министерството за финансии.