Рускиот претседател Владимир Путин изјави на државната телевизија дека е отворен за билатерални разговори со Украина. „Киев пост“ наведува дека ова претставува целосен пресврт на претходната позиција на шефот на Кремљ, кој досега тврдеше дека нема да преговара директно со киевскиот режим, додека на власт е украинскиот претседател Володимир Зеленски. Последните директни преговори меѓу Москва и Киев се одржаа во февруари 2022 година, веднаш по почетокот на руската инвазија на Украина.
„Секогаш сме изразувале позитивен став кон мировните иницијативи. Се надеваме дека и претставниците на режимот во Киев ќе размислуваат на ист начин“, изјави Путин во интервју за новинарот Павел Зарубин.
Портпаролот на Путин, Дмитриј Песков, подоцна ги потврди зборовите на рускиот претседател пред новинарите.
„Кога Путин рече дека е можно да се разговара за ненапаѓање на цивилни цели, вклучително и билатерално, мислеше на преговори и разговори со украинската страна“, изјави портпаролот на Кремљ.
Украинските медиуми јавуваат дека американскиот претседател Доналд Трамп, кој за време на неговата изборна кампања минатата година вети дека ќе ја заврши војната во Украина за 24 часа, станува сè пофрустриран бидејќи задачата се покажала како многу потешка отколку што изгледало на почетокот.
Поради ова, тој го зголемил притисокот врз двете страни да постигнат каков било договор. На 12 април, Трамп изјави за новинарите во Air Force One дека, на крајот, Москва и Киев ќе мораат или да прифатат, или да замолчат. Бидејќи предложениот велигденски прекин на огнот од страна на Москва не даде резултати, со оглед на меѓусебните обвинувања за негово прекршување, претседателот Зеленски вчера предложи 30-дневен прекин на огнот, на што Кремљ сè уште официјално не одговорил.
По тој повод, Зеленски најави дека украинска делегација ќе престојува во Лондон во среда на преговори за прекин на огнот.
„Украина, Обединетото Кралство, Франција и Соединетите Држави се подготвени да продолжат напред на најконструктивен можен начин“, изјави Зеленски во објава на социјалните мрежи.
Фокусот на состанокот ќе биде ставен на мировниот план поддржан од Трамп, за кој „Волстрит журнал“ објави дека би можел да има долгорочни последици за завршување на војната со Русија, вклучувајќи потенцијално американско признавање на Крим како дел од Русија од неговата анексија во 2014 година, како и повлекувањето на Киев од амбициите за членство во НАТО.