Косовската претседателка Вјоса Османи рече дека тензиите на север се предизвикани од „илегалните српски групи претворени од криминални банди“ кои ги нападнаа косовските полицајци, службениците на КФОР и новинарите.
Османи во објава на Твитер го осуди насилството на северот и го обвини српскиот претседател Александар Вучиќ за дестабилизација на северот на земјата.
„Овие неприфатливи акти на насилство мора да бидат осудени од сите. Оние кои ги извршуваат наредбите на Вучиќ за дестабилизација на северот на Косово мора да се соочат со правдата“, напиша претседателката.
Од утрото на 29 мај, групи составени од Срби протестираат во Звечан, Зубин Поток и Лепосавиќ поради насилното влегување на новите градоначалници на општините на север во општинските згради во петокот на 26 мај.
Војниците на мировната мисија на НАТО на Косово, КФОР, интервенираа против демонстрантите собрани пред зградата на општина Звечан.