Претседателот на ОАЕ, шеикот Мохамед бин Зајед Ал Нахјан, му го додели Орденот на Зајед, највисокото државно одликување на ОАЕ, на албанскиот премиер Еди Рама, објави новинската агенција на ОАЕ, „ВАМ“.
Одликувањето е признание за напорите на Рама за зајакнување на соработката меѓу ОАЕ и Албанија.
Одликувањето беше доделено за време на церемонијата во палатата Каср ал Бахр во Абу Даби. Рама е во посета на ОАЕ по повод Неделата на одржлив развој на Абу Даби 2026, настан што ги обединува глобалните политички и бизнис лидери.
Албанскиот премиер му се заблагодари на претседателот на ОАЕ за топлото добредојде и изрази гордост што го добил Орденот на Зајед, награда што ја одразува силата на пријателството меѓу двете земји и нивната заедничка посветеност на меѓусебно почитување и остварување на нивните заеднички интереси.
Двете страни ги разгледале можностите за зајакнување на билатералната соработка, особено во областа на инвестициите. Тие ја потврдиле својата заедничка посветеност на развивање на меѓусебни врски во приоритетните сектори што ги поддржуваат нивните напори за одржлив развој.
На состанокот се дискутираа теми од агендата на Неделата на одржлив развој 2026 и нивното значење во промовирањето на меѓународната соработка и подигањето на свеста за политичките и економските предизвици.