Кадровски промени во раководството на партијата по завршувањето на локалните избори најави денеска претседателот на СДСМ Венко Филипче. Според Филипче, овие избори се показател за тоа како да се постават и како да функционираат во следниот период.
-Сега овие избори се показател за тоа како да се поставиме и како да функционираме во следниот период, затоа што очигледно е дека потребно посебно во тие општини каде што не го постигнавме посакуваниот резултат да продолжиме со интензивна работа. Во тој контекст најавувам политички-кадровски промени во раководството после изборите за што ќе бидете известени, изјави Филипче во одговор на новинарски прашања.
Тој напомена дека се соочиле и со притисоци пред гласањето, во општините каде што имаат нивни кандидати за градоначалници.
-Имаше притисоци во вид на финансиски контроли, преку центри за социјална работа, нудење пари за гласови. За ова ги известивме надлежните институции и поради тоа работевме во тешки околности, рече Филипче.
Филипче од Аеродром ги повика жителите на таа општина во вториот круг да гласаат за нивниот кандидат за градоначалник Александар Трајановски.