MINI Countryman отсекогаш имал посебно место во гамата на оваа марка BMW: типичен кросовер помеѓу мал градски автомобил и компактен теренец, со својата просторност и возни карактеристики – бидејќи е достапен и со интегрален погон – привлече клиенти за кого класичниот Mini има премногу ограничени карактеристики. Новата генерација на овој сестран автомобил нуди повеќе простор, удобност и безбедност, а најновата верзија нуди и громогласни перформанси.
Имено, по обработката во стилот на John Cooper Works, дволитарскиот бензински турбо мотор беше подесен на дури 300 КС, што му овозможува на автомобилот да спринтува до 100 km/h за само 5,4 секунди со максимална брзина обично ограничена на 250 km/h. Промените во аеродинамиката на возилото, кое со коефициент на отпор од само 0,26 е едно од најдобрите во својата класа, исто така придонесуваат за перформансите.
Погонот е на сите тркала преку оригиналниот систем ALL4 на Mini, а директното управување, цврстата суспензија и пневматиците широки 245 mm овозможуваат дури и подигнатиот Countryman да има возни карактеристики слични на картинг, белег на сите возила со ознака Mini. Во споредба со „обичните“ изведби, зајакнати се и сопирачките, естетски разубавени со клешти на сопирачките обоени во црвено, а посебно внимание се посвети на звукот што доаѓа од издувните цевки.
Преработката John Cooper Works не би била целосна без бројните други спортски детали на надворешноста на автомобилот, исто како и без минималистичката декорација на внатрешноста на возилото. И сето тоа без да се жртвува практичноста, бидејќи задната клупа може да се помести за 13 сантиметри во должина, а багажниот простор со дарежлива зафатнина од 460 литри може да се зголеми на дури 1.530 литри.
Конечно, сите функции на автомобилот се контролираат на целосно дигитална контролна табла направена во OLED технологија со висока резолуција. Датумот на пристигнување на пазарот, исто како и цената на новиот Mini Countryman JCW, сè уште не е познат.